Hevseroka Daîreya Têkîliyên Derve ya Rêveberiya Xweser Îlham Ehmedê diyar kir ku entegrasyona HSDyê ya bi artêşê ra dê ji bo artêşeke niştimanî ya yekgirtî ku bêyî cudahî hemû Sûriyeyiyan diparêze bibe pêngaveke girîng.
Îlham Ehmed li civîna Meclisa Civata Jinan a Zenûbiya ya Kantona Reqayê axivî û rewşa siyasî ya herêmê nirxand.
Îlhamê da zanîn ku Sûriye di dîroka xwe ya siyasî û civakî da di pêvajoyeke krîtîk re derbas dibe. Ji bo garantîkirina mafên hemû pêkhateyên etnîk û olî, pêkanîna edaleta civakî, wekhevî û nenavendîbûnê, pêwîstî bi çareseriyeke demokratîk heye.
Îlham Ehmedê dîyar dike ku nenavendîbûn wekî hinek alî angaşt dikin ne perçebûn e, berevajî vê projeyek e ku armanca wê temsîliyeta adil û yekîtiya hêza hemû pêkhateyan e.
Tecrubeyên cîhanê nîşan didin ku sîstemên federal, konfederal û nenavendî bingeha îstiqrara siyasî û aborî ne.
Îlhamê behsa hevdîtinên di navbera Rêveberiya Xweser û Hikûmeta Veguhêz a Sûriyeyê da jî kir û wiha got:
“Hevdîtin di atmosfereke erênî de didomin.
Armanca me ew e ku em li ser paşeroja Sûriyeyê û saziyên îdarî û leşkerî yên ku dê beşdariya hemû pêkhateyan misoger bikin, bigihîjin rêkeftinan.
Entegrasyona Hêzên Sûriyeya Demokratîk (HSD) a bi artêşê re dê ji bo artêşeke niştimanî ya yekgirtî ku bêyî cudahî hemû Sûriyeyiyan diparêze bibe pêngaveke girîng.
Her wiha divê Bakur û Rojhilatê Sûriyeyê di saziyên hikûmetê de rasterast bên temsîlkirin.“
Îlhamê ji bo vegera ewle ya koçber û penaberan garantiyên ewlehiyê, polîtîkayên dagirkerî û Tirkkirinê yên Tirkiyeyê yên li Efrîn, Şehba, Girê Spî û Serê Kaniyê şermezar kirin û wiha got:
“Eger dewleta Tirk di aştiyê da ji dil be, Rêveberiya Xweser ji bo diyalogê amade ye. Îstiqrara Sûriyeyê, îstiqrara Tirkiyeyê û tevahiya herêmê ye.
Em dixwazin pêwendiyên me yên bi cîranên xwe ra ne li ser dagirkerî an dûrxistinê, li ser bingeha aştiyê bin.”
Îlham Ehmedê ragihand ku israra li ser birêvebiriya navendî rê li ber bipêşketinê digire û di nav bajaran da newekheviyê çêdike û bang kir ku zêdetir desthilat û çavkaniyan bidin birêvebiriyên cihî.
