Alîkarê Serokê Partiya Demokrat a Kurdistanê (PDK) Nêçîrvan Barzanî di bangeşeya hilbijartinê ya partiya xwe de li Silêmaniyê axivî.
Barzanî di axaftina xwe da got, „Asmanê Silêmaniyê beşeke xweşik a asmanê Kurdistanê ye. Dema geşta asmanê Silêmaniyê kêm bibe, geşta asmanî li Kurdistanê kêm dibe. Asman û xaka me navekî wê heye, ew jî Kurdistan e.
Kêmasiyên vê deverê ji bo PDKyê ne cihê kêfxweşiyê ne û ji bo me xemeke mezin e.“
Barzanî her wiha PDK wekî deyndarê Silêmaniyê bi nav kir û got, „Em wekî beşeke hezkirî ya Kurdistanê li vê deverê dinêrin.“
Nêçîrvan Barzanî di dumahîka axaftina xwe da wiha got, “ Divê tenê Zona Kurdistanê hebe. Kolanek li Helebceyê yan Zaxoyê bê çêkirin, em wekî hev pê kêfxweş dibin.
Dibistanek li Seyîd Sadiqê yan Herîrê bê avakirin, em wekî hev pê kêfxweş dibin.
Nabe Zona (herêm) Kesk û Zona Zer hebe, divê yek zone hebe, ew jî Zona Kurdistanê ye.“
Nêçîrvan Barzanî daxwaz ji alîgirên PDKyê yên li Silêmaniyê xwest ku ji bo komkirina milyonek deng bixebitin û ji bo wê yekê jî wiha got, „Tecrûbeyê selmandiye ku yê dikare xizmeta Kurdistanê bike, tenê û tenê Partiya Demokrat a Kurdistanê ye. Wê derfetê bidin PDK bibînin ka dê çi bike.“
Nêçîrvan Barzanî di beşeke din a gotara xwe da got, „Dema Kurdistanê sala 2005an destûra Îraqê pesend kir, teslîmbûn pesend nekir, belkî li Îraqê sîstema federaliyê pesend kir.
Birêvebiriya desthilatê bi awayekî navendî û nehiştina desthilatên Herêma Kurdistanê, tê wateya teslîmbûna Herêma Kurdistanê.
Îro ji vî bajarê ku teslîm nabe, ji Silêmaniyê em bi dengekî bilind ji her kesî ra dibêjin, PDK teslîm nabe, gelê Kurdistanê teslîm nabe.“
