Berhemeke nû ya Mihemed Malmîsanij “Ber bi Etîmolojiya Kurdiyê va Kirmancî (Zazakî), Hewramî, Kurmancî, Kurdiya Navîn (Soranî)” derket.
Pirtûk ji aliyê Weşanxaneya Wateyê va hatiye çapkirin.
Ev xebat bi taybetî li ser kokên peyvên zaravayê Kirmanckî (Zazakî) disekine û wan bi peyvên zaravayên din ên Kurdî ra dide ber hev.
Di pirtûkê de qala zaravayên Kirmanckî (Zazakî), Hewramî, Kurmancî û Kurdiya Navîn (Soranî) tê kirin.
Vekolîna kokên peyvên Kurdî
Ev xebata ku koka peyvên Kirmancî (Zazakî) vedikole, ne tenê ceribandineke etîmolojiyê ye, ew di heman demê da girêdanên dîrokî û zimannasî yên zimanê Kurdî jî dinirxîne.
Di pirtûkê da peyv ji aliyê wate, şêwe û guherîna dengan va bi hûrgulî hatine nirxandin.
Her wiha wekhevî û cudahiyên di navbera zaravayan da hatine eşkerekirin.
Rêbazeke zanistî û sîstematîk
Pirtûk bi nêzîkatiyeke sîstematîk û zanistî hatiye amadekirin da ku valahiya di vî warî da tijî bike.
Di berhemê da peyvên wan zimanên ku bi alfebeya Latînî tên nivîsandin bi şêwazê wan ê orjînal hatine parastin.
Her wiha peyvên ku bi alfebeyên Erebî, Kirîlî yan ên din hatine nivîsandin, bilêvkirina wan a bi tîpên Latînî di nav parantezên da hatiye nîşandan.
Ji bo lêkolîneran çavkaniyeke bingehîn
Ev berhema ku li ser etîmolojiya zimanê Kurdî zanyariyên nû pêşkêş dike û rêbazeke micid pêşniyar dike, ji bo lêkolîneran û her kesê ku bala wî li ser zimên e, çavkaniyeke girîng e.
